Táknmálsþýðing
Landsbanki Íslands hf. rak útibú í Bretlandi og Hollandi. Stofnað var til þessarar starfsemi á grundvelli laga nr. 161/2002. Útibú banka, sem eru staðsett í öðrum ríkjum, eru undir ákveðnu eftirliti stjórnvalda í heimaríki bankans. Bankinn bauð viðskiptavinum sínum að leggja inn á reikninga sem nefndir voru Icesave. Byrjað var að taka við innlánum í Bretlandi í október 2006 og í Hollandi í maí 2008. Greitt var í Tryggingarsjóðinn á Íslandi, heimaríki bankans, vegna þessara reikninga. Þessu er á annan veg farið þegar banki stofnar dótturfyrirtæki í öðru ríki. Þá ábyrgist tryggingarsjóður þess ríkis innstæðutryggingar reikningseigenda.
Við bankahrunið á Íslandi, í október 2008, gat Landsbanki Íslands hf. ekki greitt eigendum Icesave-reikninga út innstæður sínar. Fjármálaeftirlitið gaf út álit þessa efnis og við það tímamark varð greiðsluskylda Tryggingarsjóðsins á Íslandi virk. Í kjölfarið ákváðu yfirvöld í Bretlandi að bæta almennum viðskiptavinum bankans tjón þeirra að fullu og í Hollandi var viðskiptavinum bankans bætt tjónið að ákveðnu marki umfram lágmarksinnstæðutryggingar. Síðan var krafist endurgreiðslu á lágmarksinnstæðutryggingunum. Um þær endurgreiðslur er fjallað í Icesave-samningunum.
Tryggingarsjóðurinn á einungis fjármuni sem svara til lítils hluta af innstæðutryggingum vegna Icesave-reikninganna.
Landsbanki Íslands hf. er nú í greiðslustöðvun og slitameðferð. Unnið er að því að innheimta kröfur og selja eignir bankans. Fjármunir frá bankanum ganga með tímanum upp í skuldir hans í tiltekinni röð. Þar eru innstæðutryggingar framarlega. Hins vegar er óvíst hve mikið fæst upp í skuldir og hvenær þeir fjármunir skila sér enda er gert ráð fyrir að nokkurn tíma taki að selja eignirnar.
| < Fyrri | Næsta > |
|---|
